Bakı. Trend:
Türkiyə və İraq enerji sektorunda, o cümlədən Kərkük-Ceyhan neft
kəmərinin Bəsrəyə qədər uzadılması ilə bağlı layihələri inkişaf
etdirmək məqsədilə birgə işçi qrupların fəaliyyətini
aktivləşdirməyi planlaşdırır. Bunu Türkiyənin energetika və təbii
sərvətlər naziri Alparslan Bayraktar cümə günü bildirib.
İraqın neft naziri Basim Məhəmməd Xudeyrlə Ankarada görüşündən
sonra Bayraktar X sosial şəbəkəsində bildirib ki, tərəflər
Kərkük-Ceyhan kəmərinin İraqın cənubundakı Bəsrə vilayətinə qədər
uzadılması və onun ötürücülük qabiliyyətinin artırılması
məsələlərini müzakirə ediblər. O, bu planları Körfəz regionu və
Hörmüz boğazına güclü alternativin yaradılması baxımından mühüm
adlandırıb.
Türkiyənin dövlətə məxsus Türkiye Petrolleri Anonim Ortaklığının
(TPAO) fəaliyyət dairəsinin Kərkük neft yataqlarından kənara
çıxarılaraq İraqın digər yataqlarını da əhatə etməsi
planlaşdırılır, deyə Türkiyənin naziri əlavə edib.
İraq və Türkiyə avqustun 1-də Kərkük-Ceyhan kəməri ilə xam neft
ixracını artırmaq məqsədilə birillik saziş imzalayıb. Saziş
çərçivəsində sutkada 750 min barel neft nəql edilməsi
hədəflənir.
