Bakı.Trend:
Cənubi Koreyadan olan alimlər kiçik qan nümunəsi əsasında
qaraciyərin erkən fibrozunu aşkarlamağa imkan verən yüksək
həssaslıqlı yeni biosensor hazırlayıblar.
Tədqiqatın nəticələri “Chemical Engineering Journal” (CEJ)
jurnalında dərc olunub.
Qaraciyər fibrozu tədricən inkişaf edir və uzun müddət heç bir
əlamət vermir. Bununla belə, xəstəlik erkən mərhələdə aşkar
edilərsə, müalicə və həyat tərzinin dəyişdirilməsi sayəsində onun
inkişafını dayandırmaq, hətta geriyə çevirmək mümkündür. Hazırda
isə diaqnozun təsdiqlənməsi üçün çox vaxt qaraciyər toxumasından
nümunə götürülməsini nəzərdə tutan ağrılı biopsiya proseduru və ya
bahalı görüntüləmə üsulları tələb olunur.
Yeni sistem qanda qaraciyərdə çapıq toxumasının əmələ gəlməsinin
biomarkeri olan PICP zülalını müəyyən edir. Bunun üçün
tədqiqatçılar qızıl nanohissəciklərlə örtülmüş karbon elektroddan
və həmin zülala qarşı anticisimlərdən istifadə ediblər. PICP
anticisimlərlə birləşdikdə sensorun səthinin elektrik
xüsusiyyətləri dəyişir ki, bu da nümunənin mürəkkəb emalına ehtiyac
olmadan zülalın konsentrasiyasını müəyyən etməyə imkan verir.
