Bakı.Trend:
Amerika Birləşmiş Ştatlarının Prezidenti Donald Tramp “Truth
Social” sosial şəbəkəsində Azərbaycan Prezidenti İlham Əliyevin IV
Şuşa Qlobal Media Forumunda Azərbaycan və Ermənistan arasında
sülhün təmin edilməsinə Amerikalı dövlət başçısının verdiyi töhfə
ilə bağlı fikirlərinin yer aldığı məqaləni paylaşıb.
Məqalədə qeyd olunur ki, Azərbaycan Prezidenti İlham Əliyev ABŞ
Prezidenti Donald Trampın rolunu unikal sülhsevər insan kimi yüksək
qiymətləndirib. O bildirib ki, Trampın diplomatiyaya prinsipial
şəkildə fərqli yanaşması Azərbaycan və Ermənistan arasında tarixi
sülh sazişinin əldə olunmasında həlledici rol oynayıb və onun
sözlərinə görə, Azərbaycan-ABŞ münasibətlərində misli görünməmiş
yeni dövrün əsasını qoyub.
Azərbaycan Prezidenti ötən ilin avqustunda Ağ evdə ABŞ-nin
vasitəçiliyi ilə Azərbaycan və Ermənistan arasında imzalanmış
tarixi sülh sazişinin əldə olunması prosesində Trampın yanaşmasının
əvvəlki administrasiyaların siyasətindən nə ilə fərqləndiyi barədə “Breitbart News”un sualını cavablandırarkən bildirib ki, Amerika
liderinin uğuru uzun illər davam edən münaqişələrin nizamlanmasına
prinsipial şəkildə fərqli yanaşması ilə bağlı olub.
Azərbaycan Prezidentinin sözlərinə görə, əvvəlki
administrasiyalar təxminən otuz il ərzində Azərbaycan və Ermənistan
arasında münaqişənin faktiki olaraq dondurulmasına gətirib çıxaran
siyasət yürüdüblər. Donald Tramp isə bu problemin həllinə tamamilə
fərqli mövqedən yanaşıb.
