Bakı. Trend:
Dünya Bankı Azərbaycanda təxminən 410 milyon dollarlıq öhdəliyi
olan “Livable Baku” layihəsini maliyyələşdirməyi nəzərdən
keçirir.
Bu barədə Dünya Bankının açıqladığı məlumatda bildirilir.
Bankın məlumatına görə, layihənin ümumi dəyəri müxtəlif
mənbələrdən maliyyələşdirmə daxil olmaqla 501,25 milyon dollar
olaraq qiymətləndirilir. Layihənin icraçı agentliyi Azərbaycan
İqtisadiyyat Nazirliyi təyin edilib.
Sənədə əsasən, layihənin məqsədi Bakı və ətraf rayonların
müəyyən ərazilərində yaşayış şəraitini yaxşılaşdırmaq və iqlim
risklərinə qarşı dayanıqlığı artırmaqdır.
Layihə dörd əsas komponentdən ibarətdir.
“Birinci komponent yeni tullantıların daşınması stansiyalarının
və regional sanitariya poliqonlarının tikintisi, tullantıların
toplanması sisteminin modernləşdirilməsi və təkrar emal edilə bilən
materialların çeşidlənməsi və təkrar emalı üçün imkanların
yaradılması yolu ilə bərk məişət tullantılarının idarə olunması
sisteminin təkmilləşdirilməsini nəzərdə tutur.
İkinci komponent üç təbii gölün – Zığ, Xocasən və Böyükşor
gölünün qərb hissəsinin – eləcə də neft məhsulları ilə çirklənmiş
iki və ya daha çox ərazinin bərpasını əhatə edir.
Üçüncü komponent peşəkar inkişaf, bilik mübadiləsi və
institusional islahatlar üçün hədəf proqramları vasitəsilə layihədə
iştirak edən dövlət qurumlarının institusional potensialının
gücləndirilməsini hədəfləyir.
Dördüncü komponent layihənin idarə edilməsini, eləcə də onun
icrasının monitorinqini və qiymətləndirilməsini əhatə edir”, – bank
bildirir.
Məlumata görə, layihə haqqında məlumat 24 iyun 2026-cı ildə
açıqlanıb. Direktorlar Şurası tərəfindən layihənin nəzərdən
keçirilməsinin ilkin olaraq 18 fevral 2027-ci il tarixinə
planlaşdırılıb.
Layihənin 29 aprel 2033-cü ilə qədər başa çatması gözlənilir.
Layihənin həyata keçirilməsi üçün məsləhət xidmətləri
planlaşdırılır.
Məlumatlara görə, layihə hazırda Konsepsiyaya Baxış
mərhələsindədir.
Xatırladaq ki, Dünya Bankının Azərbaycan üzrə ölkə meneceri
Stefani Stallmeister Trend-ə verdiyi eksklüziv müsahibədə bildirib ki,
Azərbaycanla 30 ildən artıq əməkdaşlıq dövründə bank müxtəlif
layihələrə milyardlarla dollar sərmayə qoyub. O bildirib ki, mövcud
təşəbbüslərə şəhərsalma layihəsinin hazırlanması, su itkilərinin
azaldılması üçün ASRA ilə işləmək və Kənd Təsərrüfatı Nazirliyinə
suvarma sistemlərinin modernləşdirilməsində və iqlim dəyişkənliyinə
davamlı kənd təsərrüfatı təcrübələrinin tətbiqində dəstək
daxildir.
“Biz Azərbaycan hökuməti ilə tərəfdaşlıq etməkdən çox məmnunuq
və qürur duyuruq”, – deyə Stallmeister əlavə edib.
