Bakı. Trend:
Özəl sektor inkişafın hərəkətverici qüvvəsidir.
Trend-in
tədbirdəki müxbirinin verdiyi məlumata görə, bunu Azərbaycan
Biznesin İnkişafı Fondunun İdarə Heyətinin sədri Ülvi Mansurov Ərəb
Koordinasiya Qrupunun (ƏKQ) Bakıda keçirilən İİB Qrupunun İllik
Toplantısında özəl sektor üzrə iclası zamanı bildirib.
“Özəl sektor artıq sadəcə inkişafın faydalanan tərəfi deyil. O,
inkişafın, iş yerlərinin yaradılmasının, innovasiyaların
tətbiqinin, məhsuldarlığın artırılmasının və dayanıqlı
iqtisadiyyatların qurulmasının hərəkətverici qüvvəsidir. İstənilən
uğurlu iqtisadiyyat nəticə etibarilə təkcə dövlət investisiyaları
üzərində deyil, həm də sahibkarların və biznesin öz ideyalarını
imkanlara çevirmək qabiliyyəti üzərində qurulur”, – deyə o
bildirib.
Mansurov qeyd edib ki, infrastruktur və enerjidən tutmuş qida
təhlükəsizliyinə, rəqəmsal transformasiyaya və iqlim dəyişikliyinə
davamlılığa qədər yaranan imkanların miqyası heç bir qurumun
təkbaşına təmin edə bilməyəcəyi səviyyədə investisiya tələb edir.
O, bildirib ki, Azərbaycan bu yanaşmaya qətiyyətlə sadiqdir.
O, həmçinin əlavə edib ki, Azərbaycan Ərəb Koordinasiya Qrupu və
onun üzv qurumları ilə əməkdaşlığın dərinləşməsini alqışlayır.
“Onilliklərdir ki, Ərəb Koordinasiya Qrupu və onun üzv qurumları
inkişaf institutları arasında koordinasiyanın resursları səfərbər
edə, təcrübəni paylaşa və insanların həyatını necə yaxşılaşdıra
biləcəyini nümayiş etdiriblər.
Biz iqtisadiyyatlarımız və xalqımız üçün konkret nəticələr
verəcək daha çox birgə maliyyələşdirmə, daha çox innovasiya, daha
çox sərhədyanı investisiya və daha çox tərəfdaşlıq görəcəyimizi
gözləyirik”, – deyə o bildirib.
