ABŞ tərəfi hesab edir ki, onlara məxsus döyüş helikopteri İran pilotsuz uçuş aparatı (PUA) tərəfindən vurulduqdan sonra Hörmüz boğazı yaxınlığında qəzaya uğrayıb. ABŞ müstəntiqləri İran qüvvələrinin helikopteri qəsdən vurmağa çalışıb-çalışmadığını hələlik bilmirlər.
Modern.az xəbər verir ki, bu iddia ilə ABŞ-nin “Axios” portalının və İsrailin “13-cü kanal”ının müxbiri Barak Ravid “X” sosial şəbəkəsində irəli sürüb.
“ABŞ rəsmisinin mənə verdiyi məlumata görə, araşdırma zamanı İran PUA-sının ABŞ helikopterini vurduğu və bunun qəzaya səbəb olduğu müəyyən edilib. Amerikalı rəsmi bildirdi ki, istintaq hələlik bunun qəsdən, yoxsa təsadüfən baş verdiyini müəyyən edə bilməyib”, – deyə o qeyd edib.
ABŞ Prezidenti Donald Tramp “TruthSocial”-da Hörmüz boğazı üzərində İran qüvvələri tərəfindən “AH-64 Apache” helikopterinin vurulduğunu bildirib.
