Bakı. Trend:
9 May tarixi dünyada “Faşizm üzərində qələbənin ildönümü” kimi
qeyd olunur. Bu gün İkinci Dünya Müharibəsində faşizm üzərində əldə
olunan tarixi qələbənin simvolu olmaqla yanaşı, milyonlarla insanın
həyatına son qoymuş müharibənin ağrılarını və qəhrəmanlıq
salnaməsini də xatırladır. Azərbaycan xalqı da bu böyük qələbəyə
həm ön, həm də arxa cəbhədə misilsiz töhfələr verib.
İkinci Dünya Müharibəsi illərində yüz minlərlə azərbaycanlı
cəbhəyə yollanaraq faşizmə qarşı mübarizədə iştirak edib. Onların
böyük bir hissəsi döyüş meydanlarında qəhrəmancasına həlak olub.
Azərbaycan oğulları müxtəlif cəbhələrdə göstərdikləri igidliklərlə
yadda qalıb, bir çoxu yüksək hərbi mükafatlara layiq görülüb. Bu
müharibə Azərbaycan ailələrinin taleyində dərin izlər buraxıb və
xalqımızın yaddaşında ağır, lakin şərəfli bir tarix kimi
yaşayır.
Qələbənin qazanılmasında Bakı neftinin xüsusi rolu olub.
Müharibə dövründə Sovet ordusunun istifadə etdiyi yanacağın böyük
hissəsi məhz Bakıdan təmin edilirdi. Tankların, təyyarələrin və
digər hərbi texnikaların fasiləsiz fəaliyyəti üçün həyati əhəmiyyət
daşıyan neft Azərbaycanın strateji əhəmiyyətini daha da artırmışdı.
Təsadüfi deyil ki, Bakı həmin dövrdə dünyanın ən mühüm enerji
mərkəzlərindən biri hesab olunurdu.
Azərbaycan yalnız enerji resursları ilə deyil, həm də etibarlı
arxa cəbhə kimi mühüm missiya yerinə yetirib. Müharibə illərində
Bakıda və ölkənin digər bölgələrində yaralı əsgərlər üçün
hospitallar fəaliyyət göstərib, müxtəlif ərazilərdən gətirilən
qaçqınlar burada məskunlaşdırılıb. Azərbaycan xalqı humanist
mövqeyi ilə müharibədən əziyyət çəkən insanlara dəstək göstərib,
həmrəylik və mərhəmət nümunəsi ortaya qoyub.
Bununla yanaşı, Azərbaycanın coğrafi mövqeyi lend-liz proqramı
çərçivəsində də mühüm rol oynayıb. Müttəfiq dövlətlər tərəfindən
Sovet ordusuna göndərilən hərbi texnika, silah-sursat və digər
strateji yüklərin bir hissəsi Azərbaycan üzərindən daşınıb. Bu
marşrut müharibə dövründə təchizatın davamlılığını təmin edən əsas
yollar sırasında yer alıb.
9 May yalnız bir qələbə günü deyil, həm də insanlığın faşizmə
qarşı birliyinin, xalqımızın göstərdiyi fədakarlığın və
qəhrəmanlığın xatırlandığı əlamətdar tarixdir. Bu gün müharibədə
həyatını itirənlərin xatirəsi ehtiramla yad edilir, onların
göstərdiyi şücaət gələcək nəsillərə örnək kimi təqdim olunur.
