Bakı. Trend:
Rusiyanın ən böyük dövlət banklarından biri olan VEB-in uzun
illər baş iqtisadçısı vəzifəsində çalışmış Andrey Klepaç Ukrayna
münaqişəsi ilə bağlı çıxışından sonra işdən çıxarılıb.
İqtisadçılar qarşısında etdiyi çıxışdan bəzi hissələrin dərc
olunmasından bir neçə gün sonra, 2014-cü ildən Rusiyanın ikinci ən
böyük dövlət bankı olan VEB-in baş iqtisadçısı vəzifəsində çalışan
Andrey Klepaç heç bir rəsmi açıqlama verilmədən vəzifəsindən
uzaqlaşdırılıb.
Mayın 21-də etdiyi, lakin Rusiya mətbuatında yalnız ötən həftə
yayılan “Rusiya iqtisadiyyatı və geosiyasi çağırışlar” adlı
çıxışında Klepaç hesab edirdi ki, Rusiya Çin və ABŞ-dan, hətta bəzi
məsələlərdə Ukraynadan da “geri qalır”.
O, həmçinin müharibənin iqtisadi nəticələrinin sonda “ən
gözlənilməz məqamda sosial böhrana” səbəb olacağını bildirib və
Ukrayna iqtisadiyyatının yaxın zamanda çökəcəyi fikrini rədd
edib.
Hərbi xərclər, sanksiyalar və enerji infrastrukturuna hücumların
yaratdığı güclü büdcə təzyiqi fonunda Rusiya 2026-cı ilin ilk dörd
ayında 5,87 trilyon rubl (57 milyard avro) büdcə kəsiri
toplayıb.
