Bakı. Trend:
Əmək və Əhalinin Sosial Müdafiəsi Nazirliyinin tabeliyində
Dövlət Sosial Müdafiə Fondu tərəfindən bu gün iyun ayının müavinət,
təqaüd və ünvanlı dövlət sosial yardımları ödənilib.
Bu barədə məlumat Əmək və Əhalinin Sosial Müdafiəsi Nazirliyinin
saytında dərc olunub.
Məlumata əsasən, Fond bu ayın bütün sosial ödənişlərini başa
çatdırıb.
Məlumatda bildirilib ki, bundan əvvəl iyunun 12-də Bakı,
Sumqayıt şəhərləri, Abşeron rayonu, Naxçıvan Muxtar Respublikası,
iyunun 19-da isə digər bölgələrdə yaşayan pensiyaçıların və
güzəştli şərtlərlə pensiya təyin edilmiş şəxslərin iyun ayı üzrə
pensiyaları ödənilib.
DSMF-nin məlumatına görə, 2026-cı ilin yanvar-aprel ayları
ərzində pensiya, müavinət, təqaüd və ünvanlı dövlət sosial
yardımları üzrə əhaliyə ötən ilin müvafiq dövrünə nisbətən 340,1
milyon manat və ya 10,79% çox olmaqla 3,49 milyard manatdan çox
vəsait ödənilib.
2026-cı ildə Azərbaycanda sosial müavinət və təqaüdlər, əvvəlki
illərdə həyata keçirilən sosial islahatlar nəticəsində təsdiqlənmiş
və əhəmiyyətli dərəcədə artırılmış məbləğlərlə ödənilir. Ödənişlər,
vətəndaşların müraciəti olmadan elektron sistem üzərindən proaktiv
qaydada təyin edilir.
Əlilliyə görə sosial müavinətlər:
81–100% əlillik üçün – 300 manat, 61–80% əlillik üçün – 250
manat, 31–60% əlillik üçün – 180 manat.
Ailə başçısını itirməyə görə müavinət – 140 manat, hərbi
qulluqçuların uşaqlarına müavinət – 140 manat, valideynlərini
itirmiş və valideyn himayəsindən məhrum olmuş uşaqların
qəyyumlarına müavinət – 140 manat təşkil edir.
Qeyd edək ki, yaşa görə müavinət (əmək pensiyası hüququ
olmayanlar üçün): Əmək pensiyası üçün tələb olunan şərtləri yerinə
yetirməyən, rəsmi gəliri və ya stajı olmayan şəxslərə yaşa çatdıqda
təyin edilir.
