Bakı.Trend:
Bu gün Bakıda keçirilən IV Bakı Təhlükəsizlik Forumu miqyası və
iştirakçıların səviyyəsi ilə beynəlxalq təhlükəsizlik gündəmində
diqqət çəkən tədbirlərdən biri oldu.
100-dən artıq ölkənin xüsusi xidmət orqanlarının rəhbərləri və
yüksəksəviyyəli nümayəndələrinin Bakıya toplaşması forumun adi
beynəlxalq konfrans formatından fərqləndiyini göstərdi. Tədbirdə
təxminən 600 yüksəksəviyyəli nümayəndənin iştirakı təhlükəsizlik
sahəsində belə geniş dialoqun hansı miqyasda qurulduğunu ortaya
qoyur.
Forumun əsas fərqlərindən biri məhz iştirakçıların təmsil etdiyi
qurumlardır. Dünyanın müxtəlif ölkələrindən xüsusi xidmət və
təhlükəsizlik orqanlarının rəhbərlərinin eyni platformada bir araya
gəlməsi təhlükəsizlik məsələlərinin yalnız siyasi müzakirə
səviyyəsində qalmamasına imkan yaradır. Burada söhbət birbaşa
terrorçuluq, transmilli cinayətkarlıq, narkotik dövriyyəsi,
kibercinayətkarlıq və digər sərhədlərarası təhdidlərlə gündəlik
mübarizə aparan strukturlar arasında təcrübə və yanaşmaların
bölüşdürülməsindən gedir.
Bu formatın aktuallığı dünyada təhlükəsizlik mühitinin sürətlə
dəyişməsi ilə daha da artır. Əvvəllər konkret region və ya ölkə
çərçivəsində qiymətləndirilən bir sıra risklər indi qısa müddətdə
sərhədləri keçə bilir. Kiberməkanın genişlənməsi, süni intellektin
yeni imkanları, transmilli cinayət şəbəkələrinin fəaliyyəti və
qeyri-qanuni miqrasiya kimi proseslər təhlükəsizlik qurumlarının
qarşısında yeni vəzifələr qoyur.
Digər tərəfdən, müasir təhlükəsizlik yalnız fiziki sərhədlərin
qorunması ilə məhdudlaşmır. Enerji və nəqliyyat infrastrukturu,
bank sistemi, rabitə şəbəkələri, su ehtiyatları və informasiya
məkanı dövlətlərin dayanıqlığı üçün strateji əhəmiyyət daşıyır. Bu
sistemlərdən birində yaranan ciddi problem digər sahələrə də təsir
göstərə bilər. Ona görə də təhlükəsizlik məsələlərinə kompleks
yanaşma artıq seçim deyil, zərurətə çevrilir.
Bakı Forumunun mühüm tərəflərindən biri də fərqli siyasi
mövqelərə malik ölkələr arasında təhlükəsizlik dialoqu üçün kanal
yaratmasıdır. Beynəlxalq münasibətlərdə ciddi fikir ayrılıqlarının
olduğu bir vaxtda ortaq təhdidlər ətrafında peşəkar əlaqələrin
qorunması ayrıca əhəmiyyət daşıyır. Çünki terrorçuluq və transmilli
cinayətkarlıq kimi problemlər dövlətlər arasında siyasi sərhədləri
nəzərə almır.
Məhz buna görə 100-dən artıq ölkənin xüsusi xidmət orqanlarının
rəhbərlərinin Bakıda iştirakı yalnız tədbirin geniş coğrafiyasını
göstərən statistika deyil. Bu, təhlükəsizlik sahəsində beynəlxalq
əməkdaşlığa ehtiyacın artdığını və belə dialoq platformalarına
marağın yüksəldiyini göstərən mühüm göstəricidir.
Azərbaycanın yaratdığı Bakı platforması artıq dördüncü dəfədir
ki, yüksəksəviyyəli nümayəndələri eyni məkanda bir araya gətirir.
2023-cü ildən başlayan prosesin ildən-ilə genişlənməsi Forumun
ayrıca beynəlxalq dialoq formatı kimi formalaşdığını göstərir.
Bu mənada IV Bakı Təhlükəsizlik Forumunun əsas əhəmiyyəti yalnız
müzakirə olunan mövzularda deyil. Əsas məsələ dünyanın müxtəlif
ölkələrinin təhlükəsizlik strukturlarının eyni masa arxasında
oturması, dəyişən riskləri birbaşa müzakirə etməsi və praktiki
əməkdaşlıq üçün əlaqələr qurmasıdır. Qlobal təhlükələrin sərhədləri
getdikcə daha az tanıdığı bir dövrdə Bakıda 100-dən artıq ölkənin
xüsusi xidmət rəhbərlərinin bir araya gəlməsi bu platformanın niyə
geniş diqqət çəkdiyini izah edir.
