Bakı. Trend:
Azərbaycanın cari hesab profisitinin 2026-cı ildə genişlənəcəyi,
daha sonra isə 2027-ci ildə daralacağı gözlənilir ki, bu da əsasən
karbohidrogen qiymətlərinin dəyişməsi ilə əlaqədardır.
Bu barədə Asiya İnkişaf Bankına (AİB) istinadən məlumat
verib.
Bankın son hesabatına görə, neft hasilatının azalmasına
baxmayaraq, karbohidrogen qiymətlərinin daha yüksək olması 2026-cı
ildə enerji ixracı gəlirlərinin artımını dəstəkləyəcək və cari
hesab profisitini ÜDM-in 5,3 faizinə çatdıracaq. Bunun əksinə
olaraq, 2027-ci ildə gözlənilən qiymət enişləri ixrac gəlirlərini
azaldacaq, davamlı iqtisadi artım isə idxal tələbini dəstəkləyəcək
və profisiti ÜDM-in 3,5 faizinə endirəcək.
AİB analitikləri qeyd edirlər ki, neft və qaz ixracının azalması
və idxalın artması fonunda cari hesab profisiti 2024-cü ildə ÜDM-in
6,3 faizdən 2025-ci ildə 4,6 faizə enib.
“Qeyri-neft sektorundakı artımla əlaqədar olaraq ixrac 7,4 faiz
azaldığı, idxal isə 3,1 faiz artdığı üçün ticarət profisiti 8,8
milyard dollardan 6,4 milyard dollara qədər azalıb. Xidmət kəsiri
nəqliyyat xidmətləri ixracının artması ilə 19,1 faiz azalaraq 2,1
milyard dollardan 1,7 milyard dollara düşüb. Mərkəzi Bankın və
suveren sərvət fondunun birləşdirilmiş ehtiyatları 2024-cü ilin
sonundakı 71 milyard dollardan 19,8 faiz artaraq 85 milyard dollara
(ÜDM-in 114 faizi) çatıb”, – deyə hesabatda bildirilib.
Bankın məlumatına görə, suveren sərvət fondunun ehtiyatları 22,5
faiz artıb, Mərkəzi Bankın ehtiyatları isə 5,1 faiz artaraq 11,5
milyard dollara çatıb ki, bu da idxalı 7,8 ay səviyyəsində əhatə
edir. Suveren sərvət fondunun ehtiyatlarının artması əsasən qızıl
alışlarının artması ilə əlaqədardır: aktivlərdə qızılın payı il
ərzində 20,6 faizdən 38,2 faizə yüksəlib.
