Bakı.Trend:
Azərbaycan şəhər inkişafının yeni modelini formalaşdırır.
Trend xəbər verir
ki, bunu Bakıda keçirilən “Dayanıqlı və davamlı şəhər inkişafı üçün
insan kapitalının formalaşdırılması” mövzusunda beynəlxalq
konfransda çıxış edən Bakı Dövlət Universitetinin rektoru Elçin
Babayev deyib.
“Biz şəhərlərin yalnız bərpa edilmədiyi, eyni zamanda yenidən
düşünülərək formalaşdırıldığı transformasiyanın şahidi oluruq.
İşğaldan azad edilmiş ərazilərin yenidən qurulmasından “ağıllı
şəhər” və “ağıllı kənd” konsepsiyalarının tətbiqinə qədər
Azərbaycan şəhər inkişafının yeni modelini formalaşdırır. Bu
tərəqqi bizə yalnız əminlik deyil, həm də məsuliyyət verir”, – deyə
o bildirib.
E.Babayev qeyd edib ki, bu gün əsas sual belə olmalıdır: mövcud
təhsil və hazırlıq sistemləri qarşıdakı 20, 30, hətta 50 il ərzində
bu transformasiyanı dəstəkləyə biləcək insanları hazırlayırmı?
“Şəhərlər planların olmaması səbəbindən deyil, potensial
çatışmazlığı səbəbindən uğursuzluğa düçar olur. Bu, şəhərsalma
mütəxəssislərinin iqlim risklərini anlamadığı, iqtisadçıların məkan
bərabərsizliyini nəzərə almadığı, mühəndislərin isə vətəndaşların
istifadə edə bilmədiyi sistemlər yaratdığı zaman baş verir. Onlar,
məlumatlar mövcud olsa belə, onları heç kim şərh etməyi bacarmadığı
hallarda da uğursuzluğa düçar olur”, – deyə rektor vurğulayıb.
Onun sözlərinə görə, bu gün müzakirələrdən praktik fəaliyyətə
keçmək vacibdir.
“Biz urbanistika sahəsində multidissiplinar proqramlar
hazırlamalıyıq”, – deyə Babayev əlavə edib.
