Bakı. Trend:
ABŞ Dövlət Departamenti Danimarkaya AIM-120C-8 orta mənzilli
hava-hava raketlərinin satışını, ümumi dəyəri 730 milyon dollar
olmaqla, təsdiqləyib.
Trend xəbər verir
ki, məlumat hökumətlərarası müqavilələr çərçivəsində xaricə hərbi
texnika və silah tədarükündən məsul olan Pentaqonun Təhlükəsizlik
Əməkdaşlıq Agentliyi tərəfindən yayımlanıb.
Bəyanata əsasən, Danimarka hakimiyyəti əvvəllər ABŞ-dan 200
raket və əlaqəli avadanlıq almaq istəyib. Sənəddə qeyd olunub ki,
təklif olunan satış NATO müttəfiqinin təhlükəsizliyini artırmaqla
ABŞ-ın xarici siyasəti və milli təhlükəsizlik məqsədlərinə uyğun
olacaq. ABŞ tərəfi hesab edir ki, Danimarkaya raket satışı həmin
ölkənin qüvvələrinin ABŞ Hərbi Hava Qüvvələri və digər NATO üzv
dövlətləri ilə qarşılıqlı fəaliyyətini gücləndirəcək. RTX
Korporasiyasının əsas podratçı olması nəzərdə tutulur.
ABŞ administrasiyası artıq Konqresi potensial satış barədə
məlumatlandırıb. Qanunverici orqan müqaviləni nəzərdən keçirmək və
onu təsdiqləyib-təsdiqləməmək üçün 30 gün müddətinə malikdir.
