Polşa prokurorluğu 2023-cü ildə təşkil edilmiş cinayətkar qrupa rəhbərlikdə və Rusiya kəşfiyyatının xeyrinə fəaliyyət göstərməkdə şübhəli bilinən bir Rusiya vətəndaşının müəyyən edildiyini və ona qarşı ittiham irəli sürülərək axtarışa verildiyini açıqlayıb.
APA xəbər verir ki, bu barədə “Polsat News” məlumat yayıb.
İstintaq müəyyən edib ki, 28 yaşlı Rusiya Federasiyası vətəndaşı 2023-cü ildə Polşada Rusiya kəşfiyyatının fəaliyyətini təşkil edib və casusluq, diversiya, sabotaj və təbliğatla məşğul olan cinayətkar qrupun fəaliyyətini əlaqələndirib.
30 nəfərdən ibarət olan qrup üzvlərinə, o cümlədən, kəşfiyyat fəaliyyəti, antiukrayna və antinato məzmunlu vərəqələrin çapı və yapışdırılması, Ukrayna və Belarus dissidentlərinin döyülməsi və onların əmlakının yandırılması tapşırılırmış. Onların dəmir yollarında terror xarakterli cinayət kimi qiymətləndirilmiş təxribat törətmək üçün fəaliyyətlər icra etdikləri müəyyən olunub.
