Venesuelanın müxalifət lideri və 2025-ci il Nobel Sülh Mükafatı laureatı Mariya Korina Maçado Nobel Sülh Mükafatı medalını ABŞ prezidenti Donald Trampa təqdim edib və ölkədəki vəziyyəti başa düşdüyünü bildirib.
Modern.az xəbər verir ki, bu barədə “Reuters”in məlumatında bildirilib.
Maçado görüş zamanı ölkə üçün çətin bir dövrdə venesuelalıların gözləntilərini və ümidlərini müzakirə edə bildiyini vurğulayıb.
Lakin o, jurnalistlərə Trampın hədiyyəni rəsmi olaraq qəbul edib-etmədiyini aydınlaşdırmayıb.
Norveç Nobel Komitəsi bundan əvvəl bildirmişdi ki, laureat elan edildikdən sonra mükafat ləğv oluna, bölünə və ya başqa şəxslərə verilə bilməz. Mükafatın verilməsi qərarı qətidir və əbədi olaraq qüvvədə qalır.
“Reuters” qeyd edir ki, mükafatların oxşar transferləri əvvəllər də baş verib. Məsələn, 1943-cü ildə Ədəbiyyat üzrə Nobel mükafatçısı Knut Hamsun öz medalını faşist Almaniyasının təbliğat naziri Jozef Göbbelsə təqdim edib.
