Bakı. Trend:
42 dəqiqə davamlı orta-intensiv məşq hərəkətləri “operativ
hafizənin” işini əhəmiyyətli dərəcədə sürətləndirir və informasiya
emalının sürətini artırır.
Trend xarici KİV-ə
istinadən xəbər verir ki, belə bir nəticəyə Pardyu Universitetinin
alimləri gəlib.
Araşdırmanın nəticələri “Psychophysiology” jurnalında dərc
olunub. Eksperimentdə 18-50 yaşlarında 121 sağlam yetkin insan
iştirak edib. İştirakçılar kortəbii şəkildə iki qrupa bölünüblər:
birinci qrup güc məşqi (sinə jimi, çəkidə dartınma, biseps, ayaq
jimi, trenajor üzərində qol və ayaq açmaları) üzrə 65–75 faiz
maksimal çəkidə 10 təkrardan 2 yanaşma yerinə yetirib, ikinci qrup
isə sadəcə oturaraq məşqlərin videoyazısına tamaşa edib.
Güc məşqindən sonra iştirakçılar həm reaksiya ləngidilməsi, həm
də işçi yaddaş üzrə tapşırıqları daha sürətli yerinə yetiriblər və
cavabların dəqiqliyində azalma olmayıb. Beyin səviyyəsində bu, P3
komponentinin latentliyinin azalması ilə müşahidə olunub — bu
neyroelektrik marker kognitiv emal sürətinin göstəricisidir: yəni
beyin məşqdən əvvəlki vəziyyətlə müqayisədə tapşırığa daha tez
uyğunlaşıb.
Fizioloji dəyişikliklər də nəzərə çarpacaq dərəcədə olub:
məşqdən dərhal sonra qanda laktat səviyyəsi və sistolik təzyiq
əhəmiyyətli dərəcədə yüksəlib. Təhlil göstərib ki, məhz sistolik
təzyiqin qısamüddətli yüksəlişi kognitiv testlərdə reaksiyaların
sürətlənməsini qismən izah edir.
