Bakı. Trend:
Yaponiya bu ay ərazisində yerləşən hasilatçı ölkələrlə birgə
saxlanılan neft ehtiyatlarının satışına başlamağı planlaşdırır.
Trend-in
məlumatına görə, bu barədə ölkənin Baş naziri Sanae Takaiçi
açıqlama verib.
Onun sözlərinə görə, istehsalçı ölkələrlə birgə ehtiyatların
buraxılışı mart ayı ərzində həyata keçiriləcək. Takaiçi qeyd edib
ki, hökumət Yaxın Şərqdəki böhranın iqtisadi təsirlərini azaltmaq
üçün bütün mümkün addımları atacaq.
Məlumata əsasən, bu sistem Səudiyyə Ərəbistanı və BƏƏ kimi neft
istehsalçılarının Yaponiyada neft ehtiyatları saxlamasını nəzərdə
tutur və fövqəladə hallarda Yapon şirkətlərinə bu ehtiyatlara
prioritet çıxış imkanı yaradır.
Qeyd olunur ki, ABŞ və İsrailin İrana qarşı hücumları
nəticəsində yaranan tədarük problemləri fonunda Yaponiya artıq
martın 16-dan etibarən strateji neft ehtiyatlarının bir hissəsini
bazara çıxarmağa başlayıb.
