Bakı. Trend:
İtaliyanın Augusta limanında CIF bazisi üzrə Azərbaycanın “Azeri
Light” markalı neftinin qiyməti əvvəlki göstərici ilə müqayisədə
4,35 ABŞ dolları və ya 4,46 faiz artaraq bir barel üçün 101,96 ABŞ
dollarına çatıb.
Bu barədə neft bazarı iştirakçılarının məlumatında
bildirilib.
Qeyd olunub ki, Türkiyənin Ceyhan limanında FOB bazisi üzrə
“Azeri Light” markalı neftin bir barelinin qiyməti 4,47 ABŞ dolları
və ya 4,72 faiz artaraq 99,21 ABŞ dolları təşkil edib.
“Urals” markalı xam neftin qiyməti əvvəlki göstərici ilə
müqayisədə 4,5 ABŞ dolları və ya 6,34 faiz artaraq bir barel üçün
75,48 ABŞ dollarına çatıb.
Şimal dənizində hasil edilən “Dated Brent” markalı neftin
qiyməti isə əvvəlki göstərici ilə müqayisədə 4,53 ABŞ dolları və ya
4,82 faiz artaraq bir barel üçün 98,49 ABŞ dolları olub.
Azərbaycanın 2026-ci il dövlət büdcəsində bir barel neftin orta
qiyməti 65 ABŞ dolları səviyyəsində hesablanıb.
“Trading Economics”in məlumatına görə, xam neftin qiyməti cümə
axşamı ardıcıl üç sessiya bahalaşdıqdan sonra bir barel üçün 91 ABŞ
dollarından aşağı düşüb. Bildirilib ki, investorlar Yaxın Şərqdə
yenidən başlayan hərbi əməliyyatları və Hörmüz boğazının açılmasına
yönəlmiş səyləri qiymətləndirirlər.
“ABŞ Prezidenti Donald Tramp İrana qarşı son hücumların
qısamüddətli olacağını bildirib. Bununla yanaşı, o, ABŞ-nin növbəti
zərbələrə hazır olduğunu vurğulayıb və Vaşinqtonun Hörmüz boğazına
nəzarət etdiyi barədə əvvəlki fikirlərini təkrarlayıb.
ABŞ bu həftə strateji su yolu ətrafında İranın hədəflərinə yeni
zərbələr endirib. Bu hücumlar təxminən bir aylıq nisbi sakitlikdən
sonra baş verib və Tehran pilotsuz uçuş aparatları və raketlərlə
Yaxın Şərqdəki ABŞ bazalarına zərbələr endirməklə cavab verib.
Yenidən başlayan hərbi əməliyyatlara baxmayaraq, neft
tankerlərinin Hörmüz boğazından keçidi davam edib. Boğazdan sutkada
orta hesabla 8 milyon barel neft daşındığı bildirilir.
ABŞ-də isə rəsmi məlumatlara görə, ötən həftə xam neft
ehtiyatları 4,5 milyon barel azalıb. Bu, iyulun sonundan bəri
ehtiyatlarda qeydə alınan ilk azalmadır”, – məlumatda qeyd
edilib.
