Bakı. Trend:
Rur Universitetinin Boxum mütəxəssislərinin rəhbərlik etdiyi
beynəlxalq tədqiqatçılar qrupu Yer kürəsinin gecə işıqlandırmasının
təhlilini təqdim edərək, onun əhəmiyyətli regional heterojenliklə
artdığını aşkarlayıb.
Trend xəbər verir ki, bu
barədə xarici KİV-lər məlumat yayıb.
Tədqiqatın nəticələrinə görə, planet qlobal miqyasda gecələr
daha parlaq olmağa davam edir. Lakin bu dəyişikliklər son dərəcə
qeyri-bərabər şəkildə baş verir.
Peyk müşahidələrinə görə, gecə işıqlandırma səviyyələri
2014-2022-ci illər arasında hər il orta hesabla təxminən 2 faiz
artıb. Ümumi artım təxminən 16 faiz olub, lakin bu rəqəm fərqli
tendensiyaları gizlədir.
Tədqiqat Yer müşahidə peyklərində quraşdırılmış VIIRS
“Gündüz-gecə zolağı” cihazlarının məlumatlarına əsaslanır. Sistem
gecə planetin səthinin yüksəkkeyfiyyətli şəkillərini (hər piksel
üçün təxminən 0,5 km) təqdim edir və 70° şimal enliyindən 60° cənub
enliyinə qədər dəyişiklikləri qeydə alır.
Məlumatların emalı metodlarının təkmilləşdirilməsinə xüsusi
diqqət yetirilib. Xüsusilə, peykin müşahidə bucağını nəzərə alan və
həm sıx şəhər ərazilərində, həm də yaşayış məntəqələrində
işıqlandırmanın daha dəqiq qiymətləndirilməsinə imkan verən bir
alqoritmdən istifadə edilib.
