Bakı. Trend:
Səudiyyə Ərəbistanına gecə saatlarında edilən hücumlarda ölkənin
şərqində, Cübeyl şəhərində yerləşən neft-kimya kompleksi hədəf
alınıb.
Trend xəbər verir
ki, bu barədə AFP məlumat yayıb.
Hücumlar bir neçə saat əvvəl İranda oxşar obyektlərin
vurulmasından sonra baş verib.
AFP mənbəsinin bildirdiyinə görə, “SABIC” zavodlarından
partlayışın ardından yanğınlar meydana gəlib.
Qeyd edək ki, Səudiyyə Ərəbistanının Cübeyl şəhərində polad,
benzin, neft-kimya məhsulları, sürtkü yağları və kimyəvi gübrələrin
istehsalı üzrə ixtisaslaşmış dünyanın ən iri sənaye
komplekslərindən biri yerləşir.
Qeyd edək ki, fevralın 28-də ABŞ və İsrail İrana qarşı hərbi
əməliyyatlara başlayıb. Zərbələr ölkənin ən böyük şəhərlərinə, o
cümlədən Tehrana endirilib. Ağ Ev hücumu İslam Respublikasından
qaynaqlanan raket və nüvə təhdidləri ilə əsaslandırıb. İrana
endirilən zərbələr nəticəsində ölkənin ali rəhbəri ayətullah Əli
Xamenei və rəhbərliyin bəzi digər əsas fiqurları həlak olub. İranın
İnqilab Keşikçiləri Korpusu İsrailə qarşı genişmiqyaslı cavab
əməliyyatı həyata keçirdiyini bəyan edib. İran eyni zamanda
ballistik raketlər, qanadlı raketlər və pilotsuz uçuş aparatları
ilə ABŞ-nin Bəhreyn, İordaniya, İraq, Qətər, Küveyt, BƏƏ, Oman,
Səudiyyə Ərəbistanı və Suriyadakı obyektlərini hədəfə alır.
Münaqişə nəticəsində regionun enerji infrastrukturu və dəniz
nəqliyyatı da ciddi risk altına düşüb. Hörmüz boğazı ətrafında
təhlükəsizlik gərginliyi səbəbindən dünya bazarında neft qiymətləri
kəskin artıb. İran Hörmüz boğazına nəzarəti tam şəkildə özündə
saxlayaraq sadəcə lazım bildiyi gəmilərin boğazdan keçməsinə icazə
verir.
