Bakı. Trend:
ABŞ-nin İrana qarşı müharibəsi faciəvi səhv və beynəlxalq
hüququn pozulmasıdır, münaqişəyə bəraət qazandırmaq üçün gətirilən
arqumentlər isə tənqidə tab gətirmir.
Trend xəbər verir
ki, bu barədə AlmaniyapPrezidenti Frank-Valter Ştaynmayer
bildirib.
“Bu müharibə – və xahiş edirəm, vəziyyətə birbaşa cəlb olunmuş
bir şəxs kimi bu sözlərimə görə məni bağışlayasız – siyasi baxımdan
faciəvi bir səhvdir”, – deyə Ştaynmayer bildirib.
Onun sözlərinə görə, ABŞ-nin hərəkətləri beynəlxalq hüququ
pozur. Bundan əlavə, siyasətçi qeyd edib ki, ABŞ-yə guya İran
tərəfindən qaçılmaz hücum olacağına dair arqumentlər tənqidə davam
gətirmir.
Qeyd edək ki, ABŞ və İran arasında nüvə proqramı ilə bağlı
danışıqlarda konkret razılaşma əldə olunmadığına görə, 28 fevraldan
etibarən ABŞ və İsrail İrana hərbi hava hücumlarına başlayıb. Buna
cavab olaraq İran da həmin gündən etibarən İsrailə və ABŞ-nin
region ölkələrindəki hərbi obyektlərinə raket və dronlarla hücum
edib.
İrana hərbi hava hücumlarının ilk günündə İranın Ali Lideri
Ayətullah Seyid Əli Xamenei, bir sıra yüksək vəzifəli hərbçilər
ölüb. 8 martda İranın Ekspertlər Məclisi səsçoxluğu ilə Ayətullah
Seyid Əli Xameneinin oğlu Seyid Muctaba Xameneini İranın 3-cü Ali
Lideri seçib.
İrana hərbi hava hücumları nəticəsində İran Ordusunun Baş
Qərargah rəisi general-mayor Əbdülrəhim Musəvi, İslam İnqilabı
Keşikçilər Korpusunun (SEPAH) baş komandanı Məhəmməd Pakpur, Ali
Liderinin müşaviri və Müdafiə Şurasının katibi Əli Şəmxani, müdafiə
naziri Əziz Nəsirzadə, kəşfiyyat naziri İsmayıl Xətib, Ali Milli
Təhlükəsizlik Şurasının katibi Əli Laricani, Bəsic Təşkilatının
komandiri Qulamreza Süleymani və başqaları hərbi hava hücumları
zamanı ölüblər.
1-5 mart tarixlərində qarşıdurma daha da genişlənərək Yaxın
Şərqin müxtəlif ölkələrini əhatə edib.
Münaqişə nəticəsində regionun enerji infrastrukturu və dəniz
nəqliyyatı da ciddi risk altına düşüb. Hörmüz boğazı ətrafında
təhlükəsizlik gərginliyi səbəbindən dünya bazarında neft qiymətləri
kəskin artıb və bir sıra ölkələr vətəndaşlarını regionu tərk etməyə
çağırıb.
