Bakı. Trend:
Avstriyanın paytaxtı Vyananın Leopoldştadt rayonunda,
Tempelqasse küçəsində yerləşən sinaqoqun yaxınlığında qumbara
aşkarlanıb.
Trend xəbər verir
ki, bu barədə Vyana polisi məlumat yayıb.
Hüquq-mühafizə orqanlarının məlumatına görə, partlayıcı qurğu
sinaqoqun qarşısındakı binanın girişində qoyulmuş çantanın içində
tapılıb. Polis qumbaranın müsadirə edildiyini və bomba
zərərsizləşdirmə qrupu tərəfindən müayinə üçün aparıldığını
bildirib.
Qeyd olunub ki, qumbaranın olduğu çantanı sinaqoq əməkdaşı aşkar
edib. Polisə məlumat verildikdən sonra hadisə yerinə bomba üzrə
mütəxəssislər cəlb olunub və qurğu təhlükəsiz şəkildə götürülüb.
Hazırda qumbaranın İkinci Dünya Müharibəsindən qalma
olub-olmadığını müəyyənləşdirmək üçün araşdırma aparılır.
Polisin açıqlamasına görə, hadisədən bir gün əvvəl sinaqoq
əməkdaşlarına qarşı hər hansı təhdid qeydə alınmayıb və binanın
yaxınlığında partlayıcı qurğunun qoyulmasının məqsədi ilə bağlı heç
bir qeyd və ya iz aşkar edilməyib.
Hadisənin dini obyektin yaxınlığında baş verməsi nəzərə
alınaraq, məlumat Avstriyanın Dövlət Təhlükəsizliyi və Kəşfiyyat
İdarəsinə (DSN) ötürülüb.
