Bakı. Trend:
2024-cü ildə Bakıda öz nümayəndəliyini hüquqi şəxsə çevirdikdən
sonra, Almaniyada yerləşən və multimodal daşımalarla, eləcə də
təchizat zəncirlərinin idarə olunması ilə məşğul olan beynəlxalq
logistika qrupu “Rhenus Logistics” ölkə üzrə bir neçə yeni
investisiya layihəsini araşdırmağa başlayıb. Onlardan biri hazırda
qiymətləndirmə mərhələsində olan liman logistikasına dair
layihədir.
Bu barədə Trend-ə “Rhenus Logistics” şirkətindən məlumat
verilib.
“Baxmayaraq ki, bu mərhələdə konkret məlumatlar açıqlanmır,
təşəbbüs Rhenus Qrupunun Azərbaycanda multimodal və dəniz
əlaqəliliyini gücləndirmək niyyətini əks etdirir. Layihə hazırda
analiz mərhələsindədir, yoxlama başa çatdıqdan sonra növbəti
addımlar müəyyən ediləcək. Ayrı-ayrı layihələrlə yanaşı, Rhenus
dəniz, dəmir yolu və avtomobil nəqliyyatını səmərəli və davamlı
şəkildə birləşdirən inteqrə multimodal həllərin hazırlanmasına
diqqət yetirir. Buna yüklərin daşınma məntəqələrinin
modernləşdirilməsi, yeni depoların yaradılması və gömrük, liman və
dəmir yolu proseslərinin rəqəmsal inteqrasiyası daxildir”, – deyə
şirkətdən bildirilib.
Qeyd edilib ki, “Rhenus Logistics” müştərilər, tərəfdaşlar və
dövlət qurumları ilə sıx əməkdaşlıq edir və real tələbat olan
sahələrə investisiya yatırır. Uzunmüddətli məqsəd isə Azərbaycanın
iqtisadi inkişafına dəstək vermək və Transxəzər dəhlizi boyunca
etibarlı və davamlı logistika infrastrukturunun
formalaşdırılmasıdır.
“Transxəzər dəhlizi qlobal təchizat zəncirləri üçün strateji
diversifikasiya və dayanıqlılıq təmin edir. Bu marşrut Çin, Mərkəzi
Asiya və Avropanı Xəzər dənizi vasitəsilə birləşdirən alternativ
yol təqdim edir, şimal marşrutlarından asılılığı azaldır və tranzit
vaxtının daha proqnozlaşdırıla bilən olmasına şərait yaradır. Bir
çox yük göndərən üçün bu, geosiyasi risklərdən asılı olmadan
daşımaların davamlılığını təmin etmək üçün mühüm imkandır.
Azərbaycan Asiya və Avropa arasında körpü rolunu oynayır. Potensial
böyükdür: ölkə artıq effektiv multimodal əlaqələr qurmaq bacarığını
sübut edib. Məsələn, Bakıya daxil olan yük dəmir yolu ilə bir neçə
saata Gürcüstana, oradan isə Qara dənizə və ya Türkiyəyə çatdırıla
bilər ki, bu da şimal marşrutları ilə müqayisədə xeyli vaxt
qazandırır”, – “Rhenus Logistics”də vurğulanıb.
Qeyd olunub ki, bu effektivlik ticarətin diversifikasiyası və
Avrasiyanın logistika dayanıqlığının gücləndirilməsi baxımından
dəhlizi daha da cəlbedici edir.
“Lakin marşrut infrastruktur və əməliyyat çətinlikləri ilə də
üzləşir. İnfrastrukturun parçalanması və daimi “darboğazlar” bir
çox yerdə müasir terminalların, intermodal mərkəzlərin və
koordinasiya olunmuş sərhədkeçmə prosedurlarının olmaması xidmət
keyfiyyətinin qeyri-sabitliyinə və tranzit vaxtının uzanmasına
səbəb ola bilər. Texniki maneələr də qalmaqdadır: dəmir yolu
relslərinin standartlarının fərqliliyi, məhdud hərəkət tərkibi və
böyük şəhərlər arasındakı məsafələr əməliyyatların
planlaşdırılmasını çətinləşdirir. Bundan əlavə, milli normativ
aktların, tarif sistemlərinin və administrativ prosedurların
müxtəlifliyi də irəliləyişi yavaşladır və daha sıx regional
koordinasiya tələb edir. Yük göndərənlərin marşrut boyunca
proqnozlaşdırılma və şəffaflığa dair artan gözləntiləri də nəzərə
alınmalıdır”, – deyə şirkət bildirib.
“Rhenus Logistics”in vurğuladığı kimi, Transxəzər dəhlizinin
əsas üstünlükləri əlaqəlilik və diversifikasiyadır.
“Əsas vəzifə bu üstünlükləri tam uyğunlaşdırılmış, etibarlı və
iqtisadi cəhətdən rəqabətədavamlı logistika marşrutuna çevirməkdir.
Rhenus məhz buna uzunmüddətli investisiyalar, yerli əməkdaşlıq və
texniki ekspertiza vasitəsilə nail olmağa çalışır”, – deyə şirkət
bildirib.
