Dünya Bankı 2025-ci ildə Azərbaycanın cari əməliyyatlar balansının (CƏB) profisitini ÜDM-in 4,2 % səviyyəsində proqnozlaşdırır, əvvəlki proqnoz göstəricisi ÜDM-in 11,6 %-nə bərabər idi.
“Report” Dünya Bankının hesabatına istinadən xəbər verir ki, bu göstəricinin gələn il ÜDM-in 3,7 %-nə (əvvəlki proqnoz 5,4 % idi), 2027-ci ildə isə 3,3 %-nə (3,4 %-ə qarşı) qədər azalacağı gözlənilir.
Azərbaycan Mərkəzi Bankının (AMB) məlumatına görə, 2025-ci ilin birinci yarısında cari əməliyyatlar balansının profisiti ÜDM-in 6,3 %-ni təşkil edərək 2,3 milyard ABŞ dollarına çatıb ki, bu da 2024-cü ilin yanvar-iyun ayları ilə müqayisədə 11,7 % azdır.
“CƏB profisiti 2024-cü ilin birinci yarısında ÜDM-in 7,7 %-dən bu ilin eyni dövründə ÜDM-in 6,3 %-nə enib. Bu, karbohidrogen ixracının azalmasını və idxalda mötədil artımı əks etdirir”, – bank qeyd edir.
Bankın proqnozlarına görə, cari ildə Azərbaycanın mal və xidmət ixracı ÜDM-in 39,1 %-ni, 2026-cı ildə 39,5 %-ni, 2027-ci ilin sonuna qədər isə 38,8 %-ni təşkil edəcək.
Bundan başqa, Dünya Bankının gözləntilərinə görə, Azərbaycanın mal və xidmət idxalı 2025-ci ildə ÜDM-in 34,2 %-ni, 2026-cı ildə 32,2 %-ni, 2027-ci ildə isə 31,2 %-ni təşkil edəcək.
AMB 2025-2026-cı illərdə CƏB profisitinin illik 3-4 milyard ABŞ dolları səviyyəsində qalacağını proqnozlaşdırır.
Azərbaycan hökuməti 2025-ci ildə CƏB profisitini ÜDM-in 5,6 %-i səviyyəsində, 2025-2028-ci illərdə isə neft və qaz hasilatı proqnozlarını nəzərə alaraq ÜDM-in ildə təxminən 3 %-i səviyyəsində gözləyir.
“Fitch Ratings” beynəlxalq reytinq agentliyinin proqnozlarına görə, 2025-ci ildə Azərbaycanın tədiyə balansının cari əməliyyatlar hesabının profisiti 4 milyard ABŞ dolları və ya ÜDM-in 5,3 %-ni təşkil edəcək, 2026-cı ildə isə bu göstərici ÜDM-in 4,9 %-nə və ya 3,9 milyard ABŞ dollarına qədər azalacaq.
IMF-nin proqnozlarına görə, 2025-ci ildə CƏB profisiti 6,1 milyard ABŞ dolları (ÜDM-in 7,8 %-i) təşkil edəcək, 2026-cı ildə isə 3,4 milyard ABŞ dollarına (ÜDM-in 4,1 %-i) qədər azalacaq.
