Bakı. Trend:
Poti və Bakı limanları arasında ixtisaslaşmış blok-qatarın
istismara verilməsi Orta Dəhliz boyunca intermodal əlaqəliliyin
yaxşılaşdırılması istiqamətində mühüm addım olub.
Trend xəbər verir
ki, bunu Gürcüstanın Dəniz Nəqliyyatı Agentliyinin direktoru İvane
Abaşidze öz sosial şəbəkə səhifəsində yazıb.
O bildirib ki, ilk blok-qatarın Poti terminalına gəlişi
Gürcüstan Dəmir Yolları və Azərbaycan Dəmir Yollarının
rəhbərliyinin iştirakı ilə keçirilən təntənəli tədbirlə qeyd
olunub. Bu, təşəbbüsün həyata keçirilməsində ikitərəfli
əlaqələndirmənin yüksək səviyyədə olduğunu nümayiş etdirib.
“Blok-qatar müntəzəm əsasda fəaliyyət göstərəcək ki, bu da iki
liman arasında tranzit vaxtını əhəmiyyətli dərəcədə azaltmağa və
konteyner logistikasını sadələşdirməyə imkan verəcək. Qatar
Poti–Bakı–Poti marşrutu üzrə boş konteynerlərin dəmir yolu ilə
daşınmasını təmin edəcək, bu isə avtomobil yollarına düşən yükü
azaldacaq və emissiyaların ixtisarı hesabına ekoloji effekti təmin
edəcək.
Bu təşəbbüs Orta Dəhliz çərçivəsində konteyner daşımalarının
təhlükəsizliyini, səmərəliliyini və proqnozlaşdırıla bilməsini
artıraraq marşrutu yük göndərənlər üçün daha cəlbedici və rəqabətə
davamlı edir”, – paylaşımda qeyd olunub.
Qeyd edək ki, yanvarın 30-da Gürcüstanın Poti limanında
“Azərbaycan Dəmir Yolları” QSC və “Gürcüstan Dəmir Yolları” AC-nin
rəhbərliyinin iştirakı ilə Poti–Bakı ekspress blok-qatarının yola
salınması mərasimi keçirilib.
Tədbirdə yeni ekspress qatarın istifadəyə verilməsinin
əhəmiyyəti vurğulanıb, həmçinin bu xidmət sayəsində yük
göndərənlərin təkcə vaxta deyil, eyni zamanda yüklərin və boş
konteynerlərin terminallarda saxlanması ilə bağlı xərclərə də
qənaət edə biləcəyi bildirilib.
Qeyd edək ki, Orta Dəhliz regionun bir sıra ölkələrindən keçən,
Asiya ilə Avropanı birləşdirən nəqliyyat və ticarət marşrutudur.
Bu, ənənəvi Şimal və Cənub dəhlizlərinə alternativdir.
Marşrut Çindən başlayır və Qazaxıstan, Özbəkistan və
Türkmənistan kimi Mərkəzi Asiya ölkələrindən keçərək, Xəzər dənizi,
Azərbaycan, Gürcüstan və Türkiyədən keçərək Avropaya çatır. Orta
Dəhliz Asiyanın şərq bölgələrini, o cümlədən, Çini Avropa ilə
birləşdirən, daha uzun dəniz yollarından yan keçməklə quru yolu
təklif edir.
