Bakı. Trend:
ABŞ və İsrailin İrana qarşı hərbi hava hücumları nəticəsində 28
fevraldan etibarən bu günə qədər İranın Tehran vilayətində 503
nəfər ölüb.
Trend-in
məlumatına görə, bunu İranın Qırmızı Aypara Cəmiyyətinin Tehran
üzrə idarəsinin baş direktoru Məhəmməd İsmayıl Təvəkkoli yerli
mediaya açıqlamasında deyib.
Onun sözlərinə görə, sözügedən müddətdə Tehran vilayətində 5 700
nəfər yaralanıb. Yaralılardan 4 700 nəfəri tibb mərkəzlərinə
çatdırılıb.
Təvəkkoli qeyd edib ki, ölən və yaralananlardan təxminən 85%-i
mülki şəxslər, eləcə də uşaqlar və qadınlar təşkil edir.
Qeyd edək ki, ABŞ və İran arasında nüvə proqramı ilə bağlı
danışıqlarda konkret razılaşma əldə olunmadığına görə, 28 fevraldan
etibarən ABŞ və İsrail İrana hərbi hava hücumlarına başlayıb. Buna
cavab olaraq İran da həmin gündən etibarən İsrailə və ABŞ-nin
region ölkələrindəki hərbi obyektlərinə raket və dronlarla hücum
edib.
İrana hərbi hava hücumlarının ilk günündə İranın Ali Lideri
Ayətullah Seyid Əli Xamenei, bir sıra yüksək vəzifəli hərbçilər
ölüb. 8 martda İranın Ekspertlər Məclisi səsçoxluğu ilə Ayətullah
Seyid Əli Xameneinin oğlu Seyid Muctaba Xameneini İranın 3-cü Ali
Lideri seçib.
1-5 mart tarixlərində qarşıdurma daha da genişlənərək Yaxın
Şərqin müxtəlif ölkələrini əhatə edib.
ABŞ tərəfinin itkisinin 13 ölü, 140-dan çox yaralı olduğu
bildirilib.
Münaqişə nəticəsində regionun enerji infrastrukturu və dəniz
nəqliyyatı da ciddi risk altına düşüb. Hörmüz boğazı ətrafında
təhlükəsizlik gərginliyi səbəbindən dünya bazarında neft qiymətləri
kəskin artıb və bir sıra ölkələr vətəndaşlarını regionu tərk etməyə
çağırıb.
