Bakı. Trend:
28 fevraldan etibarən ABŞ və İsrail tərəfindən İranda 21,7
mindən çox qeyri-hərbi məkan vurulub.
Trend-in
məlumatına görə, bunu İranın Qırmızı Aypara Cəmiyyətinin sədri
Pirhüseyn Kulivənd yerli mediaya açıqlamasında deyib.
Onun sözlərinə görə, 17,3 min mənzil, 4,12 min ticarət obyekti
və 160 müalicə mərkəzi vurulub.
Kulivənd bildirib ki, ABŞ və İsrailin hərbi hava hücumları
nəticəsində 9 xəstəxana fəaliyyətini dayandırıb.
İranlı rəsmi qeyd edib ki, 69 məktəb, Qırmızı Aypara
Cəmiyyətinin 16 mərkəzi, 21 xilasetmə avtomobili və 19 təcili
yardım maşını vurulub.
Qeyd edək ki, ABŞ və İran arasında nüvə proqramı ilə bağlı
danışıqlarda konkret razılaşma əldə olunmadığına görə, 28 fevraldan
etibarən ABŞ və İsrail İrana hərbi hava hücumlarına başlayıb. Buna
cavab olaraq İran da həmin gündən etibarən İsrailə və ABŞ-nin
region ölkələrindəki hərbi obyektlərinə raket və dronlarla hücum
edib.
İrana hərbi hava hücumlarının ilk günündə İranın Ali Lideri
Ayətullah Seyid Əli Xamenei, bir sıra yüksək vəzifəli hərbçilər
ölüb. 8 martda İranın Ekspertlər Məclisi səsçoxluğu ilə Ayətullah
Seyid Əli Xameneinin oğlu Seyid Muctaba Xameneini İranın 3-cü Ali
Lideri seçib.
1-5 mart tarixlərində qarşıdurma daha da genişlənərək Yaxın
Şərqin müxtəlif ölkələrini əhatə edib.
ABŞ tərəfinin itkisinin 8 ölü, 140-dan çox yaralı olduğu
bildirilib.
Münaqişə nəticəsində regionun enerji infrastrukturu və dəniz
nəqliyyatı da ciddi risk altına düşüb. Hörmüz boğazı ətrafında
təhlükəsizlik gərginliyi səbəbindən dünya bazarında neft qiymətləri
kəskin artıb və bir sıra ölkələr vətəndaşlarını regionu tərk etməyə
çağırıb.
