Bakı. Trend:
İran prezidenti Məsud Pezeşkian Azərbaycan və Ermənistan
arasında sülh yolu ilə həll prosesindəki irəliləyişi alqışlayaraq,
bunu təhlükəsizliyin möhkəmləndirilməsi və regional əməkdaşlığın
inkişafı istiqamətində mühüm addım adlandırıb.
Trend-in
məlumatına görə, bu barədə İran prezidenti Tehranda Ermənistanın
müdafiə naziri Suren Papikyanla görüşdə bildirib.
Görüşdə Pezeşkian İranın Ermənistan da daxil olmaqla qonşuları
ilə hərtərəfli əlaqələri genişləndirməyə hazır olduğunu vurğulayıb
və Tehranla Yerevan arasında strateji tərəfdaşlıq sənədinin
hazırlanmasını başa çatdırmaq niyyətində olduğunu bildirib. Onun
sözlərinə görə, İranın siyasəti sülhün, sabitliyin və davamlı
təhlükəsizliyin dəstəklənməsi məqsədi daşıyır və istənilən
qeyri-sabitləşdirici hərəkətlər regiondakı bütün ölkələrə zərər
verir.
Papikyan da öz növbəsində müdafiə, iqtisadi və nəqliyyat
sahələrində uğurlu əməkdaşlığı qeyd etdi və İranla tərəfdaşlığın
strateji əhəmiyyətini vurğuladı.
