Bakı. Trend:
Böyük Britaniyanın Baş naziri Kir Starmer ABŞ Prezidenti Donald
Trampla telefon danışığında Qrenlandiya ilə bağlı fikir
ayrılıqlarına görə Böyük Britaniya da daxil olmaqla səkkiz Avropa
ölkəsinə tarif tətbiq etmək qərarını yanlış adlandırıb.
Trend-in
məlumatına görə, bu barədə Böyük Britaniyanın Baş nazirinin mətbuat
xidməti bildirib.
“Baş nazir bu axşam bir sıra telefon danışıqları apardı. O,
Danimarkanın Baş naziri Mette Frederiksen, Avropa Komissiyasının
prezidenti Ursula fon der Leyen və NATO-nun baş katibi Mark Rutte
ilə danışdı. Daha sonra o, Prezident Trampla danışdı”, – deyə
bildirilib.
“Telefon danışıqları zamanı Baş nazir Qrenlandiya ilə bağlı
mövqeyini bir daha təkrarladı. O, bildirib ki, Avro-Atlantik
maraqlarını qorumaq üçün Uzaq Şimalda təhlükəsizlik bütün NATO
üzvləri üçün prioritetdir. O, həmçinin bildirib ki, kollektiv
təhlükəsizliyin təmin edilməsi üçün müttəfiqlərə rüsumların tətbiqi
səhvdir”, – deyə qeyd olunub.
