İordan çayının qərb sahilinin şimalında yerləşən Silat əl-Haritiyya kəndində keçirilən reyd zamanı İsrail əsgərlərinə partlayıcı qurğu atan fələstinli güllələnərək öldürülüb.
APA xəbər verir ki, bu barədə İsrail Müdafiə Qüvvələri (İDF) məlumat yayıb.
Hərbçilərin bildirdiyinə görə, paraşütçülər briqadasının kəşfiyyat bölməsinin əsgərləri atılan partlayıcı qurğudan xəsarət almayıb.
“Əsgərlər atəşlə cavab verərək terrorçunu zərərsizləşdiriblər”, – deyə ordunun açıqlamasında bildirilib.
Fələstin Muxtariyyətinin WAFA xəbər agentliyi həmin şəxsin 16 yaşlı Məhəmməd İyad Abahreh olduğunu açıqlayıb. Agentlik fələstinli təhlükəsizlik mənbələrinə istinadən xəbər verir ki, İDF onu öldürdükdən sonra cəsədini götürüb.
Bundan əlavə, ordunun məlumatına görə, şənbə axşamı İordan çayının qərb sahilində yerləşən Beyt-El yaşayış məntəqəsinə aparan yolda hərəkət edən iki fələstinli şübhəli saxlanılıb.
İDF bildirib ki, əsgərlər onların avtomobilində bıçaqlar və bir balta aşkar ediblər. Ordu əlavə edib ki, saxlanılan şəxslər əlavə dindirilmə üçün polisə təhvil verilib.
