Bakı. Trend:
2025-ci ildə Türkiyədə inflyasiyanın zəifləməsinin davam
etməsinə baxmayaraq, ölkə iqtisadiyyatı mülayim artım templəri
nümayiş etdirir. Bununla belə iqtisadi siyasətə inamın artması
çətin məsələ olaraq qalmaqdadır.
Trend bu barədə
“Fitch”ə istinadən xəbər verir.
Qeyd olunur ki, bütün regionda monetar və fiskal stimullaşdırma
perspektivləri məhduddur, həmçinin əsas inflyasiya təzyiqinin davam
etməsi sərt pul-kredit siyasətinin zəruriliyini qabardır, Orta və
Şərqi Avropa ölkələrində dövlət borcunun ümumi artımı isə fiskal
konsolidasiya tələb edir.
“2025-ci ildə Şərqi Avropa ölkələrində iqtisadi artım müəyyən
dayanıqlıq göstərsə də, davam edən inflyasiya təzyiqi və borc
səviyyələrinin yüksəlməsi səbəbindən siyasətdə manevr imkanları
məhdud olaraq qalır”, – deyə “Fitch Ratings”in Şərqi Avropa
ölkələrinə dair hesabatında bildirilir.
“Güclü daxili istehlak və ABŞ-nin tariflərinə qabaqlayıcı
reaksiya 2025-ci ildə Mərkəzi və Şərqi Avropada (MŞA) artımı
dəstəklədi, lakin ticarət sahəsindəki qeyri-müəyyənlik qlobal artım
perspektivlərinə təsir göstərdiyindən regionda iqtisadi artımın
sürətlənməsi məhdud olacaq. Qafqazda iqtisadi fəallıq yüksək olaraq
qalır, Türkiyə iqtisadiyyatı isə orta səviyyədə artım nümayiş
etdirir.
Dövlət borcunun səviyyəsi artdıqca, dövlət maliyyəsi MŞA
regionunda reytinqlərə təsir edən əsas amil olaraq qalır. Lakin
daxili siyasi şərait və zəif artım templəri fiskal konsolidasiyanı
çətinləşdirir. Ukraynada davam edən müharibə və ABŞ-nin NATO
qarşısındakı öhdəlikləri ilə bağlı narahatlıqlar səbəbindən
geosiyasi risklər yüksək olaraq qalır. Türkiyədə isə daxili siyasət
iqtisadi siyasətə inamın möhkəmlənməsi üçün risklər yaradır”, –
deyə məlumatda qeyd olunur.
“Fitch”in məlumatına əsasən, 2024-cü ildən etibarən ümumilikdə
Şərqi Avropa ölkələrinin reytinqləri üzrə proqnozlar zəifləyib.
Mənfi proqnozlar dövlət maliyyəsinin pisləşməsinin (Polşa,
Rumıniya) və daxili siyasi qeyri-müəyyənliyin (Gürcüstan) davam
etməsini əks etdirir.
Bildirilib ki, bu amillər Serbiyanın (BB+) iqtisadi artımı üçün
risk yaradır, baxmayaraq ki, ölkə üzrə müsbət proqnoz dövlət
borcunun azalmasını və xarici iqtisadi mövqenin möhkəmlənməsini əks
etdirir.
