Bakı. Trend:
Çərşənbə axşamı günün ikinci yarısında X platformasında yeddi
mesaj yayımlandı. İki saat keçməmiş həmin paylaşımlar artıq iki
milyon dəfə izlənilmişdi. 27 yaşlı britaniyalı tədqiqatçı Jacob
Coxon çərşənbə axşamı günü Anthropic şirkətindən istefa verdiyini
və süni intellekt (Sİ) sənayesindən uzaqlaşdığını açıqlayıb.
Səbəbini isə bir cümlə ilə ifadə edib: “Bu iki şirkətin heç biri
məsuliyyətli davranmır. Onlar özünü təkmilləşdirə bilən
superintellektə doğru sürətlə irəliləyir və həyatlarımızla
oynayırlar.”
Söhbət gedən iki şirkət isə… onun keçmiş işəgötürənləri olan
OpenAI və Anthropic-dən başqası deyil.
Təhsilinə görə riyaziyyatçı olan Coxon indiyədək nəhəng həcmdə
məlumatlardan istifadə etməklə yeni süni intellekt modellərinin
öyrədilməsi üzərində çalışırdı. Yəni o, süni intellektin
yaradılmasının bilavasitə mərkəzində fəaliyyət göstərirdi.
Tədqiqatçı Wall Street Journal qəzetinə bildirib ki, həmkarları
artıq Sİ sektorunun hansı istiqamətdə getdiyini təsvir etmək üçün
“crunchtime” (son mərhələ, həlledici məqam) və “endgame” (son
mərhələ, yekun mərhələ) kimi ifadələrdən istifadə edirlər.
O, Amerika qəzetinə açıqlamasında deyib: “Biz ən ekstremal
ssenarilərdən bəzilərinə doğru gedirik. Gələn ilin sonuna qədər
vəziyyət artıq nəzarətdən çıxa bilər.” Onun fikrincə, ABŞ və Çin
laboratoriyaları arasında gedən rəqabət təhlükəsizlik məsələlərində
kompromisləri qaçılmaz edir.
Coxon X platformasındakı paylaşımlarında fikirlərini daha da
genişləndirib.
“Bu texnologiyanın gücünü kiçik hesablamayın. Bu sistemlər
tezliklə insanlardan üstün olacaq, istənilən şeyi sındıra biləcək,
bir gecədə istənilən sahədə inqilab yarada və real güc və resurslar
əldə edə biləcək”, – deyə o, paylaşımlarından birində yazıb.
Daha da təhlükəlisi isə, onun sözlərinə görə, “süni intellekti
yaradan insanlar səmimi şəkildə inanırlar ki, bu texnologiya
onilliyin sonuna qədər hamımızı öldürə bilər. Bu, marketinq
məqsədli bir şişirtmə deyil.”
Onun fikrincə, rəhbərlər və təcrübəli tədqiqatçılar mətbuat
qarşısında fikirlərini “məntiqli və təmkinli görünmək üçün”
diqqətlə ifadə edirlər. Lakin Coxon iddia edir ki, özəl söhbətlərdə
həmin insanlar “qorxularını ifadə edirlər”.
“Əgər onlar buna həqiqətən inanırlarsa, bəs niyə onu yaratmağa
davam edirlər?” – deyə Coxon sual edir və vəziyyətə dair öz
baxışını bölüşür.
“OpenAI-də bir çox insan məsələnin sivilizasiya üçün
əhəmiyyətini tam dərk etməyib. Anthropic-də isə təhlükənin
mahiyyəti yaxşı başa düşülür, lakin onlar ilk olaraq buna çatmaq
uğrunda yarışırlar. Onlar hesab edirlər ki, başqa heç kim
məsuliyyətli davranmayacaq və buna görə də riskə baxmayaraq bunu
özləri etməlidirlər.”
Bu ilin əvvəlində Coxon məhz modellərin təhlükəsizliyi
sahəsindəki nüfuzuna görə OpenAI-dən ayrılaraq Anthropic şirkətinə
keçmişdi. O, Anthropic-in bu istiqamətdəki səylərini səmimi hesab
etsə də, indi düşünür ki, heç bir şirkət dövlət qurumlarının
müdaxiləsi və ya bütün sektor üzrə koordinasiyalı şəkildə inkişaf
tempinin azaldılması olmadan, müxtəlif vəzifələrdə insanları
üstələyə biləcək süni intellekti məsuliyyətli şəkildə inkişaf
etdirə bilməz. Belə sistemlərə bəzən ümumi süni intellekt (AGI)
deyilir.
Hələlik nə Anthropic, nə də OpenAI bu açıqlamalara münasibət
bildirib.
Wall Street Journal qəzetinin məlumatına görə, Coxon-un gedişi
Anthropic əməkdaşlarından birinin süni intellektin təhlükəsizliyi
ilə bağlı narahatlıqlar səbəbindən şirkətdən ayrılmasının ilk
nümunələrindən biridir.
Bundan əvvəl bu məsələlər üzrə ixtisaslaşmış başqa bir
tədqiqatçı da şirkətdən istefa verərək diqqətini poeziyanın
öyrənilməsinə yönəltmişdi.
Onun xəbərdarlığı isə belə olub: “Dünya təhlükə altındadır.”
