Bakı. Trend:
ABŞ Xəzinədarlığı Prezident Donald Trampın təsviri olan 1
dollarlıq yeni kolleksiya sikkələrinin buraxılmasını düşünür.
Trend-in
məlumatına görə, bu addım ölkənin yaranmasının 250 illiyinin qeyd
olunması çərçivəsində planlaşdırılır.
Məlumata görə, sikkədə ABŞ bayrağı fonunda qaldırılmış yumruqla
Trampın təsviri yer ala bilər. Bu görüntü 2024-cü ildə ona sui-qəsd
cəhdindən sonra çəkilmiş fotoşəkilə istinad edir. Xəzinədarlığın
sözçüsü bildirib ki, son dizayn hələ təsdiqlənməsə də,
departamentin kollektor sikkələrini zərb etmək üçün qanuni
səlahiyyəti mövcuddur.
Xəbəri şərh edən Ağ Evin mətbuat katibi Kerolayn Livitt
bildirib: “Trampın xəbəri görüb-görmədiyini bilmirəm, amma əminəm
ki, bu xəbər onun xoşuna gələcək”.
ABŞ-də xatirə sikkələrinin buraxılması uzunmüddətli ənənədir.
Tarixi ən məşhur nümunələrdən biri 1986-cı ildə buraxılmış və
təxminən 15,5 milyon nüsxə satılan Azadlıq Heykəli sikkəsidir.
Bundan əlavə, Corc Vaşinqtonun 250 illiyi, 1984-cü il Los-Anceles
Yay Olimpiya Oyunları və ABŞ Konstitusiyasının 200 illiyi ilə bağlı
buraxılmış sikkələr də uğurlu olub.
