Səfir Amanul Haq: “Banqladeş İƏT-in digər üzvləri kimi Ermənistanın təcavüzünü pisləyir” – MÜSAHİBƏ + FOTO

Dünya


“Banqladeş İƏT-in digər üzvləri kimi Ermənistanın təcavüzünü pisləyir”.

Bunu Banqladeşin Türkiyədəki səfiri Amanul Haq “resmixeber.az”un Ankara bürosuna müsahibəsində deyib.

Onunla müsahibəni təqdim edirik:

– Cənab səfir, 166 milyondan çox əhalisi olan Banqladeş bir zamanlar Şərqi Pakistan adlandırılıb. Xahiş edirik, ölkənizin müstəqillik əldə etməsi barədə danışasınız.

– Banqladeş 1971-ci ildə millət atamız Banqabandhu (Banqladeş xalqının dostu – red.) Şeyx Mucibur Rəhmanın rəhbərliyi altında müstəqilliyini əldə edib. Hər il martın 26-da Müstəqillik Günümüzü qeyd edirik. Banqabandhu həmişə Banqladeşi “Shonar Bangla” (Qızıl Benqal – red.) etmək arzusunda idi. Bu da öz xalqı üçün harmoniya və xoşbəxtlik içində yaşayacaqları dinc və firavan bir ölkə qurmaq demək idi.

Təəssüf ki, millət atamız 1975-ci il avqustun 15-də məğlubiyyətə uğradıldı. Müstəqillik əleyhinə olan qüvvələr, onların davamçıları Şeyx Mucibur Rəhmanı ailəsi ilə birlikdə güllələyib öldürdü. Amma buna baxmayaraq, hazırkı hökumətdə olan onun bacarıqlı qızı, Baş nazirimiz dəfələrlə sui-qəsdlərə, həbsə məruz qalan, ağır mübarizə yolu keçən Şeyx Hasina Vecid atasının bu arzusunu reallaşdırmaq üçün yorulmadan səy göstərir. Banqladeş onun rəhbərliyi və cəsarətli addımlarına görə az inkişaf etməkdə olan ölkə siyahısından inkişaf etməkdə olan ölkə səviyyəsinə yüksəlib.

– Azərbaycanla Banqladeş BMT və İslam Əməkdaşlıq Təşkilatı (İƏT) çərçivəsində əməkdaşlıq edirlər. Sizcə, iki ölkə arasında əməkdaşlığı daha hansı sahələrdə genişləndirmək olar?

– Siz düzgün qeyd etdiniz ki, Banqladeş BMT və İƏT çərçivəsində Azərbaycanla əməkdaşlıq edir. Habelə hər iki ölkə Qoşulmama Hərəkatının üzvüdür. Banqladeş Azərbaycanı müstəqilliyini 30 dekabr 1991-ci ildə tanıyıb və 1992-ci il fevralın 26-dan etibarən diplomatik əlaqələr qurub. Hazırda hər iki ölkə BMT-nin müxtəlif qurumlarında, xüsusən İƏT-də birgə fəaliyyət göstərir. Hər iki paytaxtda keçirilən beynəlxalq konfranslar çərçivəsində nazirlər səviyyəsində səfərlər olur.

Banqladeş beynəlxalq münasibətlərini “Hamıya dost olmaq, heç kimə kin saxlamamaq” prinsipi əsasında ardıcıl şəkildə davam etdirir. Azərbaycanla münasibətlərimiz də bu prinsipdən istisna deyil. Bizim biznes, investisiya və iqtisadi əməkdaşlıq sahələrində birgə işləmək üçün çoxlu imkanlarımız var.

– Hər iki ölkə həm də islam mədəniyyətinin bir hissəsidir…

– Hər iki ölkənin bir hissəsi olan islam mədəniyyəti, ortaq islami dəyərlərimiz bizə sülh, tolerantlıq və harmoniya mədəniyyətini öyrədir. İnanıram ki, biz bu cür oxşarlıqlara diqqət yetirməklə mövcud ikitərəfli əlaqələrimizi daha da genişləndirə və gücləndirə bilərik.

– 30 ildən sonra Azərbaycan işğal altındakı torpaqlarını geri qaytardı. Banqladeşin Qarabağ məsələsi ilə bağlı mövqeyi necə olub və hazırda necədir?

– Banqladeş münaqişələrin sülh yolu ilə həllinə inanır. Qarabağ məsələsi ilə bağlı mövqeyimiz çox aydındır. Bu il martın 16-17-də İƏT Xarici İşlər Nazirləri Şurasının Mavritaniyada keçirilmiş 49-cu sessiyası zamanı Azərbaycan tərəfindən irəli sürülən beş qətnamə qəbul edilib. Həmin qətnamələrdə Ermənistanın təcavüzü pislənilir.

– Cənab səfir, 2020-ci ilə qədər Banqladeşin Türkiyədəki səfiri Azərbaycanda da eyni vaxtda akkreditə olunmuşdu. Hazırda bu səlahiyyəti İrandakı Banqladeş səfirliyi daşıyır. Bu səlahiyyət Banqladeş Xalq Respublikasının Türkiyədəki səfirliyinə yenidən keçə bilərmi?

– Doğrudur, 2020-ci ilə qədər Banqladeşin Türkiyədəki səfiri Azərbaycanda eyni vaxtda akkreditə olunmuşdu. Xarici İşlər Nazirliyində mütəmadi akkreditə edilmiş ölkələrin siyahısına yenidən baxılması və müvafiq olaraq yenidən bölüşdürülməsi prosesi baş verir. Ona görə də gələcəkdə Azərbaycanın eyni vaxtda akkreditasiyasının Banqladeşin Türkiyədəki missiyasına dəyişdirilməsinin mümkünlüyünü istisna etmirəm.

www.RESMIXEBER.az

Spread the love

Bir yanıt yazın

E-posta adresiniz yayınlanmayacak. Gerekli alanlar * ile işaretlenmişlerdir