Bakı.Trend:
Media Təhlil Mərkəzinin (MTM) vətəndaşlar arasında keçirdiyi son
sorğu muzeylərə münasibətdə diqqətçəkən bir mənzərə ortaya
qoyur.
Trend xəbər
verir ki, respondentlərin 72,6%-i muzeylərə yüksək maraq
göstərdiyini bildirib. Bu göstərici onu deməyə əsas verir ki,
muzeylər artıq yalnız “keçmişi qoruyan səssiz məkanlar” kimi qəbul
edilmir. Cəmiyyət onları bilik, düşüncə və identiklik formalaşdıran
canlı platformalar kimi görür. Sürətli informasiya axını şəraitində
insanların daha dərin, etibarlı və konteksti olan mənbələrə üz
tutması bu marağın əsas səbəblərindən biridir.
Sorğu nəticələrinə görə, respondentlərin 77,2%-i tarix
muzeylərini, 61,2%-i isə incəsənət muzeylərini daha çox ziyarət
edir. Bu seçimlər təsadüfi deyil. Tarix muzeyləri kollektiv yaddaşı
möhkəmləndirir, milli kimliyi gücləndirir və keçmişlə bağ qurmağa
imkan yaradır. İncəsənət muzeyləri isə emosional və estetik
ehtiyacları qarşılayır, mədəni özünüifadəni təşviq edir.
Ən çox ziyarət edilən muzeylər sırasında Milli Azərbaycan Tarixi
Muzeyi, Milli İncəsənət Muzeyi, Xalça Muzeyi və ev-muzeyləri yer
alır. Bu fakt auditoriyanın əsasən tanınmış və etibarlı mədəni
institutlara üstünlük verdiyini göstərir.
Sorğuda iştirak edənlərin 60%-i Bakı şəhərindən, 40%-i isə
regionlardan olub. Paytaxt auditoriyasının üstünlük təşkil etməsi
muzey infrastrukturunun və mədəni tədbirlərin əsasən Bakıda
cəmləşməsi ilə izah olunur. Bununla belə, regionlardan gələn yüksək
pay muzeylərə marağın coğrafi baxımdan məhdud olmadığını
göstərir.
Respondentlərin fikrincə, muzeylərə marağın artırılması üçün ən
effektiv addımlar gənclər və məktəblilər üçün xüsusi proqramların
təşkili, sosial şəbəkələrdə aktiv tanıtım və interaktiv sərgilərin
keçirilməsidir.
Sorğu həmçinin göstərir ki, interaktiv ekranlar və audio
bələdçilər nisbətən daha çox istifadə olunur, lakin mobil tətbiqlər
və virtual turlar hələ geniş yayılmayıb. Bu isə muzeylər üçün açıq
inkişaf istiqamətidir. Rəqəmsal həllər xüsusilə gənc auditoriya və
regionlarda yaşayan insanlar üçün muzey təcrübəsini daha əlçatan
edə bilər.
Respondentlərin 64,1%-i muzeylər haqqında məlumatı sosial
şəbəkələrdən əldə etdiyini bildirib. Bu fakt ictimai marağın
formalaşmasında rəqəmsal platformaların rolunun artdığını açıq
şəkildə göstərir. Muzeylər üçün bu, sadəcə reklam imkanı deyil,
hekayə anlatmaq və auditoriya ilə davamlı əlaqə qurmaq
fürsətidir.
Ümumilikdə sorğu nəticələri göstərir ki, muzeylərə maraq
yüksəkdir və bu maraq dərin sosial-mədəni əsaslara söykənir.
