Bakı. Trend:
Hökumət, bazar və cəmiyyət “yaşıl keçid”i irəlilədə bilər.
Trend xəbər
verir ki, bunu Azərbaycanın energetika nazirinin müavini Elnur
Soltanov Bakı İqlim Fəaliyyəti Həftəsində bildirib.
O qeyd edib ki, insan iqlim məsələləri ilə uzun müddət məşğul
olduqda, bu sahədə müəyyən təcrübə qazanır:
“Sürətlə irəliləmək üçün bir neçə məqamı qeyd etmək istəyirəm.
Birincisi, geosiyasət önəmlidir, çünki bu proses interhökumətlidir.
Lakin geosiyasətlə bağlı çox mürəkkəb mexanizmlər var. Ümumiyyətlə,
burada cəmiyyətin, xüsusən də gənclərin, övladlarımızın göstərdiyi
təzyiq mühüm rol oynayır və bu, bütün dünyaya aiddir.
Dövlətlərin öz milli maraqlarını güddüyü bir dünyada, məsələ
əsasən onların rəqabət üstünlüyünü necə irəlilətməsindən asılıdır.
Hamımız qlobala necə qayğı göstərdiyimizi danışa bilərik, amma
dövlətlərin təbiətinə görə, bu məsələnin müəyyən dərəcədə milli
maraqlarla üst-üstə düşməsi vacibdir. Biz şanslıyıq ki, bir çox
hallarda yaşıl keçid prosesini irəlilətmək bir çox ölkənin milli
maraqlarına xidmət edir, xüsusən texnoloji innovasiya və
iqtisadiyyata töhfəsi baxımından”.
Nazir müavini vurğulayıb ki, bəzi ölkələr üçün isə, məsələ
enerji təhlükəsizliyi və özünəqabiliyyətlilikdir:
“Şəxsi söhbətlərdə onlar etiraf edirlər ki, bütün bu böyük
insanlıq missiyaları bir yana, məsələnin milli maraqlarla üst-üstə
düşməsi onların üçün məntiqlidir. Mənim üçün bu üst-üstə düşmə
kifayət qədər böyükdür və prosesin irəlilədiyinə əmin olmaq üçün
yetərlidir.
İkincisi, heç bir hökumət, heç bir hökumətlər birliyi bu prosesi
lazımi sürətlə irəlilədə bilməz. Sürət, yəni 2050-ci il üçün “net-zero” və 1,5°C istiqamətli net-zero hədəflərinə çatmaqdır. Bu
baxımdan hökumətin əsas rolu özəl sektoru aktivləşdirməkdir. Başqa
yol yoxdur. Bazar qüvvələri sərhəd tanımır. Yəni bazar qüvvələri
daxil olmadan həll yolu yoxdur”.
E. Soltanovun sözlərinə görə, hökumət və fondların əsas vəzifəsi
prosesi sürətləndirmək, lazım gəlsə əlavə resurs xərcləməkdir ki,
bazar qüvvələri işə düşsün və irəliləsin:
“Bazar qüvvələrinin iştirakının vacibliyi ondadır ki, bəzi yaşıl
texnologiyalar bazar tərəfindən həyata keçirilə bilər, amma
bəziləri hələ çox bahalıdır və bazar aktorları onlara daxil
olmur.
Üçüncüsü isə, cəmiyyətin qüvvəsidir. İnsanların gözündəki
həvəsi, məsələyə olan səmimi münasibəti, məsələn, Nyu-York və
Berlində gördüyümüz kimi, böyük rol oynayır. İnsanların bu həvəsi
və yaradıcılığı çox güclüdür. Uşaqları öyrətmək, maarifləndirmək
çox önəmlidir, çünki uşaqlar valideynlərinə göstərdikləri təzyiqi
kiçik görmək olmaz. Bu, özlüyündə ayrıca bir gücdür”.
