Bakı. Trend:
Dünyanın müxtəlif hava yolları “Airbus A320” təyyarələrində
Günəş radiasiyasına bağlı zəifliyi tez bir zamanda aradan
qaldırmağın yolunu tapıblar.
Trend xəbər verir
ki, bu barədə “Bloomberg” məlumat yayıb.
“Airbus” şirkətinin açıqlamasına görə, nasazlıq hündürlüyün
hesablanmasına cavabdeh proqram təminatının bir hissəsinə təsir
göstərib. Yüksək hündürlüklərdə intensiv Günəş radiasiyası
məlumatları təhrif edə bilər və bunun nəticəsində geniş yayılmış
uçuş gecikmələri və ləğvlər baş verə bilər.
Təxminən 6000 A320 ailə təyyarəsi bu problemə məruz qalıb.
Təyyarələrin elektron idarəetmə sistemi idarəetmə və uçuşa nəzarət
komponentləri arasında birbaşa mexaniki əlaqə olmadan işləyir və
bütün pilot əmrləri kompüter vasitəsilə həyata keçirilir.
“Airbus” və Avropa Aviasiya Təhlükəsizliyi Agentliyinin
fövqəladə göstərişindən 24 saat keçməmiş, “A320” təyyarələrinin ən
böyük operatorları – “American Airlines”, “IndiGo” və “easyJet” –
donanmalarını əvvəlki proqram təminatı versiyasına geri
qaytarıblar. “American Airlines” bildirib ki, texniki komandası bir
gecədə işləyərək 209 təyyarədən yalnız dördündə texniki xidmət
tələb olunacağını müəyyən edib.
Mənbələr qeyd edir ki, proqram təminatının əvvəlki versiyasına
qayıtmaq təxminən 2-3 saat çəkir, lakin minə qədər köhnə təyyarənin
avadanlıqlarının tam təkmilləşdirilməsi tələb oluna bilər. Bu zaman
həmin təyyarələr müvəqqəti olaraq istismardan çıxarılacaq.
