bp, Azərbaycan Respublikasının İqtisadiyyat Nazirliyi və SOCAR
ilə əməkdaşlıqda 29–30 sentyabr tarixlərində yüksək performanslı
hesablama (HPC), hövzənin tədqiqi innovasiyaları, seysmik emal və
məlumatların toplanması sahəsində irəliləyişlərə həsr olunmuş iki
günlük texniki seminar keçirib.
Seminar bp, İqtisadiyyat Nazirliyi, SOCAR və Xəzər İnnovasiya
Mərkəzinin mütəxəssislərini bir araya gətirərək bilik və təcrübə
mübadiləsi aparmaq, gələcək əməkdaşlıq imkanlarını araşdırmaq
məqsədi daşıyıb.
Seminarda aşağıdakı əsas mövzular müzakirə olunub:
- Azərbaycanın HPC sahəsində imkanları: İqtisadiyyat Nazirliyinin
nümayəndələri ölkədə yeni yaradılmış superkompüter imkanını təqdim
edərək, onun enerji sektorunda innovasiyaların sürətləndirilməsinə
töhfə verə biləcək potensialını vurğulayıblar. Belə bir imkanın
yaradılması Azərbaycanın öz rəqəmsal transformasiyasını dəstəkləmək
üçün güclü HPC infrastrukturu qurmaq öhdəliyini əks etdirir. - bp-nin qlobal HPC təcrübəsi: bp mütəxəssisləri şirkətin
Hyustonda yerləşən HPC mərkəzinin fəaliyyəti barədə məlumat
veriblər. Bu mərkəz bp-nin texniki innovasiyalarını irəli aparmaqla
yanaşı, lay simulyasiyası, rəqəmsal süxurlar, data elmi, seysmik
görüntüləmə və hövzə modelləşdirilməsi sahələrində imkanlarını
genişləndirir. - Azərbaycanda seysmik məlumatların toplanması və emalı: SOCAR
nümayəndələri seysmik məlumatların toplanması və emalı sahəsində
gələcək planları təqdim edərək bu texnologiyaların region üçün
strateji əhəmiyyətini vurğulayıblar. - Əməkdaşlıq layihələri: bp texniki imkanların artırılması və
innovasiyaların sürətləndirilməsi məqsədilə həyata keçirilən mövcud
və planlaşdırılan əməkdaşlıq təşəbbüslərini təqdim edib. - Seysmik texnologiyalarda süni intellektin tətbiqi: Xəzər
İnnovasiya Mərkəzi SOCAR-ın seysmik süni intellekt tətbiqləri
sahəsində son nailiyyətlərini göstərərək süni intellektin lay
görüntüləməsinə yeniliklər gətirdiyini və qərarların verilməsini
sürətləndirdiyini nümayiş etdirib.
Seminar sənaye ilə hökumət arasında davamlı əməkdaşlığın
vacibliyini bir daha vurğulamaqla yanaşı, sağlam rəqabətin
olmasının da regionun texnoloji irəliləyişində və Azərbaycanın
qabaqcıl enerji texnologiyaları sahəsində regional lider mövqeyinin
gücləndirilməsində əhəmiyyətli rol oynadığını diqqətə çatdırıb.
